Недела на шпански филм од 21 до 27 ноември во Кинотека

Од 21 до 27 ноември во Кинотеката на Македонија ќе бидат прикажани седум филмови од шпанската кинематографија. Неделата на шпански филм в среда ќе почне со филмот „Добредојдовте господине Маршал“ на режисерот Луис Гарсија Берланга од 1953 година.

Во наредните денови ќе бидат прикажани: анимираниот „Чико и Рита“ во режија на Тоно Ерандо, Хавиер Марискал и Фернандо Труеба од 2010 година; „Југот“ на Виктор Ерис од 1983; „Смртта на велосипедистот“ на режисерот Хуан Антонио Бардем од 1955; „Без срам“ на Јоакин Ористрел од 2011; „Црвената верверичка“ во режија на Хулио Медем од 1993 и играниот филм „Пеперутка“ на Хозе Луис Куерда снимен во 1999 година.

– Овие седум наслови се своевиден мал пресек на шпанската кинематографија и според хронолошкиот и според тематско-жанровскиот пристап. Овој избор обединува автори од различни филмски епохи и со различни естетики, но, во секој случај, претставува временска парабола од средината на минатиот век до денес. Тој временски период е речиси колку еден просечен животен век, па сигурно е интересно да се проследи созревањето на една национална кинематографија низ различни авторски видувања, соопшти Кинотеката.