Заев – Тевдовски: Владата останува посветена на поддршката на развојните програми на општините

Претседателот на Владата на Република Македонија, Зоран Заев, придружуван од министерот за финансии, Драган Тевдовски, денеска се сретна со Управниот одбор на Заедницата на единиците на локалната самоуправа (ЗЕЛС), предводена од претседателот на ЗЕЛС, градоначалникот на Град Скопје, Петре Шилегов.

На средбата, соопшти владината служба за информирање, се разговарало за актуелни теми произлезени од Закон за дополнување на Законот за финансирање на општините.

Претставниците од ЗЕЛС, пред премиерот ги елаборирале своите видувања и предлози за подобро имплементирање на ова законско решение за понатамошно непречено искористување на развојниот капацитет на општините.

– Владата на Република Македонија е многу свесна за важноста на општините во земјава, и оттаму со ваквото решение сакаме да го намалиме нивниот долг, за да можеме да сметаме на нивниот капацитет, кој сега е десеткуван. Затоа одлучивме да одвоиме педесет милиони евра како поддршка за општините, во форма на еднократна финансиска инјекција, за да можат градоначалниците да ги стабилизираат развојните капацитети на своите општини, рекол премиерот Заев на средбата.

Тој уште и посочил дека заложба на Владата е да ја помогне работата на општините, со цел проектирање и реализација на повеќе развојни и капитални проекти, со што граѓаните ќе добиваат подобри услуги за даноците кои ги плаќаат и ќе бидат комплетно информирани за трошењето на тие средства.

Премиерот Заев, исто така истакнал дека сите предлози кои доаѓаат од ЗЕЛС се добродојдени и се во духот на конструктивноста во пристапот на решавањето на актуелните проблеми со задолженоста на локалните самоуправи во Македонија, како и за финансиско стабилизирање на општините.

Министерот Тевдовски на средбата појаснил дека планирањето на буџетите ќе се базира на реална основа, односно, буџетот на општините ќе може да се проектира со максимални 10 отсто раст во однос на просекот од остварените приходи во последните три години. Тоа е мерка која претставува гаранција дека проблемот со задолжувањето на општините нема да се повтори, затоа што, како што истакнал тој, ќе се спречат таложења на неплатени обврски и ќе се подобри финансиското работење на општините.

Претставниците од ЗЕЛС ја поздравиле заложбата на Владата да им се помогне на општините да го решат проблемот со презадолженоста, со што како што посочиле тие на средбата, ќе можат со поголем капацитет да се посветат на конструктивна работа и решавање на конкретни проблеми во интерес на граѓаните.