Претпремиера на „Нема да платам“ во театар Комедија

НУ театар Комедија ќе ја заокружи работната година со претставата „Нема да платам“ од Дарио Фо, во режија на Александра Кардалевска.

Претпремиерата ќе се одржи денеска, а премиерата на „Нема да платам“ е утре.

– Сценографијата ја направи Зоран Ѓурески, а костимографијата е на Маја Ѓуреска и Антонија Гунинска Јорданоска. Изборот на музика го изврши Александар Јорданов, а драматург е Дарко Јан Спасов, соопштија од Театар Комедија.

Улогите ќе ги толкуваат Атанас Атанасовски, Валентин Костадиновски-Тино, Зорица Нушева, Жаклина Петровска и Александар Михајловски.

– Политичката сатира „Нема да платам“, на добитникот на Нобеловата награда за литература, италијанскиот драмски писател, сценарист, режисер, актер и борец за човекови права и еднаквост Дарио Фо, ги пресликува реакциите на потрошувачите против зголемување на цените и е провокативна реакција против злоупотребите и неправдата на општеството, наведуваат од Театар Комедија.