Двапати проверени сите индустриски објекти, пишани 4 казни

Според планот за работа на инспекторите за животна средина на Град Скопје, извршени се по две редовни контроли на сите 40 инсталации кои подлежат на Б–Интегрирана еколошка дозвола, за кои е надлежен Град Скопје.

- Во месец декември овластените инспектори за животна средина на Град Скопје, извршија вонредни контролни мерења на 4 инсталации што подлежат на Б–Интегрирана дозвола, како и на 4 субјекти што подлежат на Eлаборат за заштита на животната средина. При вонредните контроли на овластените инспектори за животна средина со овластена лабораторија досега е утврдено пречекорување на граничните вредности кај 4 инсталации кои се под надлежност на Град Скопје и истите ќе бидат санкционирани согласно со Законот за заштита на животната средина – одговори Шилегов на вчерашната седница за советнички прашања.

Дополнително, Секторот Инспекторат воведе и сменско работење (дежурства) кое започнува од 6 часот наутро, како и после полноќ, се до раните утрински часови, како и за време на викендите, сé со цел попрецизно и пореално да се утврди можното загадување на амбиенталниот воздух.