Манифестација „Коледарски хепенинг“ во Гевгелија

Во пресрет на големиот христијански празник Божик вечер во Гевгелија по 26. пат ќе се одржи традиционалната манифестација „Коледарски хепенинг“.

Покрај големиот коледарски оган, со топол чај, вино и лесна закуска, граѓаните на Гевгелија и многубројните гости кои доаѓаат од Грција ќе имаат можност да си ги честитаат празниците и да добијат бадникови гранчиња за здравје, среќа и бериќет во Новата година.

Присутните на „Коледарскиот хепенинг“, кој сите овие години претставува настан за сплотување на граѓаните на општина Гевгелија преку коледарско-бадниковата традиција, ќе ги забавуваат музички групи и пејачи од земјата.

Верни на својата традиција ќе останат и жителите на селото Негорци кои велат дека се горди на манифестацијата што ја организираат во Старец маало, затоа што за Коледе единствено кај нив се палат стари и шупливи дрва кои повеќе не вегетираат.