Актерите за јубилејот на прилепскиот театар: Има врвни признанија, но нема нов театар
Прилепскиот театар „Војдан Чернодрински“ денеска одбележува 69 години од постоењето или од првата театарската претстава „Кир Јања“ од од Ј.С.Поповиќ, во режија на Аце Михајлоски. Вечер од 19.30 часот ансамблот ќе го одбележи јубилејот со претставата „Пиреј“ од Петре М. Андреевски во режија на Љупчо Горѓиевски.
Денот, ансамблот го поминува работно, во проби за претставата „Демократија“ во режија на Кирил Петрески.
Еден од доајените на прилепскиот театар, Марјан Чакмакоски вели дека има што да се памети низ годините и децениите во прилепскиот театар. Оттука се оформиле врвни македонски театарски, актерски и режисерски имиња, а театарот се уште функционира во зградастара речиси 100 гопдини која била некогашното прво прилепско кино. Копнежот по нова театарска зграда е евидентен.
Во овие речиси 70 години на прилепскиот театар, мислам дека ќе се паметат многу работи. Во овој објект овде, кој сам по себе е историја, се случиле многу убави претстави и театарски моменти и не случајно опстоил 7 децении. Сакам новите генерации да дочекаат многу поубави услови, го заслужуваат тоа. Впрочем, публиката и градот заслужуваат нов театар, вели Чакмакоски.
Актерката Ангела Наумоска која е и добитник на наградата за најдобар актер на ланскиот, последен Македонски театарски фестивал Војдан Чернодрински“ кој се одржува во прилеп, смета дека актерите се тие кои создаваат уметност, а публиката е таа која се огласува и ќе ги оценува достигнувањата.
– Добро е да има уште поубави услови. Но, добро е што екипата ни е компатибилна, те прифаќа таков каков што си. Публиката ќе го каже своето, се надевам и во наредните седум децении, вели Наумоска.
Прилепскиот театарски ансамбл е единствен во Македонија кој за 10 години пет пати ја освоил најпрестижната награда на МТФ „Војдан Чернодрински“ за најдобра претстава. Врвните резултати зависта од ансамблот кој е најголемото богатство на театарот, смета режисерот Кирил Петрески.
-Екипата е најголемата инспирација за работа во овој театар и мислам дека така ќе остане и во следните години. Друго се тејхничките услови. Театар се прави и на улица. Најбитна е екипата и посакувам ваква и да остане: расположена креативна и вредна, смета Петрески.
Ансамблот работи во крајно тешки технички услови. Имаше најави дека ќе се гради нов театар, но од тоа се уште нема реално ништо. Според актерите Димитар Ѓорѓиевски и Михајло Миленкоски, најбитен е односот на државата, а освен тоа те3атарот 20 години нема правен статус и е под капата на центарот за култура „Марко Цепенков“.
– Ние, актерите, сите си ја сакаме, си ја обожуваме работата, но техничките улови се лоши. Се надеваме дека, барем, наредните 50 години дека условите ќе се подобрат, ако не за нас, за идните генерации. Сегашните услови се такви долги години. И не е до староста на објектот, иако има 100 ина години. Не е толку до немањето финансиски средства, туку е до неодржувањето. На пример, во Лондон има театри од 1520 година, а се одржувани и функционираат. Сега , нареден чекор би бил да се реновираат објектите или да се изгради нов театар. А потоа, се треба да се одржува. И нека биде нов театар, ама ако не се одржува, за 20 години ќе се распадне. А парадоксално е дека колку условите се полоши, а политичката ситуација е потурболентна, ние сме покреативни. Всушност тоа е и како своевидна инспирација. Но, сепак, успесите треба да се наградат, дали за ансамблот директно или со подобрување на техничките услови. Проблемот е што се нема слух да се одговори правопропорционално на тоа што ние го работиме. Ако покажуваме резултати, тогаш и другата страна треба да возврати. Во случајов Министерството за култура или државата. Но во светот има и други начини. на пример мецени на театарската уметност. Но ние сме мало општество, а во моментов, наш мецена е државата, смета актерот Ѓорѓиевски.
– Ми пречи што како правна институција прилепскиот театар не постои. Во рамките е на Центарот за култура „Марко Цепенков“ веќе 20 години. Тажно е што се отвораат нови театри, ама прилепскиот правно две децении не постои. Како актер посакувам да прославиме 70 години, наредната година, и театарот како институција да се врати и да постои, заклучува младиот актер во приелпскиот театар Михајло Миленкоски.
Според статистиките, во 69 години се одиграле над 370 премиери или преку 7.000 претстави пред публика од 2 милиона. меѓу најгфледаните до ден денес се комедиите „Солунски патрдии“ и „Од кол на кол“.
