Избор од поезијата на Матеја Матевски за 90 години од неговото раѓање
По повод деведесетгодишнината од раѓањето на академик Матеја Матевски, „Матица македонска“ објави избор од неговата поезија, насловен според неговата позната стихозбирка – „Дождови“. Деведесет песни од богатиот опус на авторот се застапени во овој избор што го подготви поетот Раде Силјан.
-Матеја Матевски (Истанбул, 1929 – Скопје, 2018) припаѓа во редот на челниците на современата македонска литература. Во изминатите децении на богата и континуирана творечка активност тој создаде дела кои го легитимираат како автентична и неповторлива книжевна појава, како стаменит творец, кој во нашиот духовен простор востанови високи естетски стандарди, пишува Раде Силјан во поговорот насловен „Поетските завештанија на Матеја Матевски“.
Матевски е автор на 24 стихозбирки, седум книги со критики и есеи, четири капитални антологии од шпанската, каталонската и галициската поезија, а како пасиониран преведувач на македонски јазик има преведено над шеесет одделни книги од шпански, француски, словенечки, албански, италијански, српски и од други јазици.
Добитник е на голем број национални и меѓународни награди, а во 2011 година ја доби и наградата „Златен венец“ на Струшките вечери на поезијата.
