Тевдовски: Растот на економијата ќе биде над три проценти
Министерот за финансии Драган Тевдовски смета дека е реален проектираниот раст на БДП од 3,2 отсто за 2019 година и е оптимист дека растот на економијата годинава постојано ќе биде над три проценти.
-Проектираниот раст од 3,2 процента апсолутно може да се оствари, бидејќи е направен без премногу подигнати очекувања од аспект на членството во НАТО кое ни се случува. Со тоа очекуваме сериозни приливи на дополнителни странски инвестиции и дополнително заживување на економијата. Оптимисти сме дека годинава економијата ќе се движи со стапка повисока од три проценти. Со податоците во 2018 година покажавме дека сме кредибилна институција и дека можеме да го исполните тоа што го проектираме, рече Тевдовски во одговор на новинарско прашање на денешната прес-конференција во Владата.
Според него, намалувањето на извозот во јануари годинава за 1,9 отсто и падот кај земјоделските производи за 26,2 процента се должи на сезонската флуктуација.
-За трговската размена најбитно е што трговскиот дефицит во 2018 година е најнизок во последните 15 години. Ако порано се движеше од 20 до 25 проценти, сега е намален на 17 проценти. Вториот важен параметар е покриеноста на увозот со извоз која во 2011 година беше нешто над 63 проценти, а лани завршивме со покриеност од 76,7 проценти во поглед на трговскиот дефицит што е одлична бројка, потенцира Тевдовски.
