Ван дер Сар: Сите во Ајакс веруваме дека можеме да го елиминираме Јувентус

Извршниот директор на Ајакс, Едвин ван дер Сар го прокоментира четвртфиналниот судир во Лигата на Шампионите, кој ги спротивставува неговиот клуб против Јувентус. Холандскиот тим е сметан за аутсајдер во овој судир, но поранешниот голман, кој бранел и за двата тима, смета дека амстердамци имаат реална шанса да ги отстранат италијанскиот шампион.

– Ова ќе е возбудлив судир против Јуве. Ние сме среќни што сме во четвртфиналето. Тимот играше на високо ниво против Реал Мадрид и се надевам дека ќе ја повториме истата игра и против Јувентус во Амстердам. Играчите веруваат во своите способности, дека можат да го елиминираат Јуве. Имаме млад тим, но додадовме и доволно искуство со привлекувањето на Тадиќ и Блинд. Се уште сме во Лигата на Шампионите и имаме свои шанси против Јувентус, откако веќе го победивме Реал Мадрид и игравме одлично против Баерн, изјави Ван дер Сар.

Тој зборуваше и за својот поранешен соиграч од Манчестер Јунајтед, Кристијано Роналдо, кој сега е ѕвезда на Јувентус, но е повреден и не е сигурно дали ќе може да игра во Амстердам.

– Го познавам Кристијано добро. Игравме заедно 4 години. Знам колку брзо се опоравува неговото тело и колку е силен психички. Тој ќе стори сé за да биде подготвен за натпреварот, бидејќи сака неговиот тим да продолжи напред. Тоа сепак е целта и на Ајакс, додаде шефот.