Без вода високата зона во Куманово

Надлежните од кумановското јавно претпријатие „Водовод“, денеска информираа дека вечерва дел од корисниците од високата зона од градот ќе немаат вода поради реализација на проектот „За употреба и одржување на дел од водоснабдителниот систем на град Куманово“.

Во соопштението на „Водовод“ се наведува дека ноќва, во периодот од 23:00 до 4:00 часот, без вода ќе бидат жителите на населбите „Железничка Станица“, „Черкезе“, од реонот на Пчињски пат, улиците „Косовски бригади“, „Бајрам Шабани“ и улиците во тој дел од Куманово.

Во рамки на проектот „За употреба и одржување на дел од водоснабдителниот систем на град Куманово“ во Филтер станицата, ќе бидат заменети старите со нови мерачи на секој доводен и одводен вод, на 16 локации ќе бидат поставени нови електронски мерачи на притисок и протокомери, со што „Водовод“ ќе има увид во потрошената и фактурираната вода.

Проектот се спроведува преку Министерството за транспорт и врски, а изведувач е фирмата „ЦМЦ“ од Скопје.