Гвардиола го пофали Ливерпул за играта на „Камп Ноу“

Менаџерот на Манчестер Сити, Пеп Гвардиола, зборуваше позитивно за презентацијата на Ливерпул на „Камп Ноу“ пред неколку дена. Тимот од Мерсисајд загуби со 3-0 од Барселона, но според шпанскиот стратег, кој го следеше во живо натпреварот во средата, „црвените“ треба да бидат горди на својата игра.

– Не верувам дека поразот на Ливерпул може да им влијае. Мислам дека натпреварот беше многу добар. И двата тима беа неверојатни. Презентацијата на Ливерпул беше исклучителна. Ми се допадна да ги гледам. Се бореа многу. Се разбира, гостувањето на Њукасл не е лесно, како што не е лесен и нашиот натпревар со Лестер. Ќе видиме што ќе се случи, но тие ќе бидат добро подготвени и ќе се обидат да го добијат натпреварот, изјави Гвардиола.

Запрашан дали Лионел Меси бил најголемата разлика во натпреварот во средата, Пеп одговори: „Да, но освен тоа Барселона се бранеше многу добро. Тие победија неверојатен тим. Во Ливерпул треба да се горди на настапот. Играа на најтешкиот за гостување стадион во светот и го направија тоа со многу храброст и карактер“.