Во Пелагониските општини почна изборниот процес
Општинските изборни комисии во Битола, Демир Хисар, Новаци и Могила, утрово потврдија дека на сите избирачки места е во тек изборниот процес во тамошните општини.
На Единствениот избирачки список во општина Битола се евидентирани 81.738 гласачи со право на глас, и тие денес гласаат на 169 гласачки места, потврди Ѓуро Илиќ, претседател на ОИК-Битола, додека на Единствениот избирачки список во Општина Демир Хисар евидентирани се 6.955 гласачи со право на глас, а тие гласаат на 41 гласачко место, изјави Митко Јанкуловски, претседател на ОИК-Демир Хисар.
Од 7 часот утрово, отворени се гласачките места и во помалите пелагониски општини Новаци и Могила.
На Единствениот избирачки список во Општина Новаци евидентирани се 2.959 гласачи кои денес гласаат на 24 гласачки места, потврди Стефче Стефановски, претседател на ОИК-Новаци, додека на Единствениот избирачки список во Општина Могила се евидентирани 5.282 гласачи со право на глас, а тие гласаат на 23 гласачки места, потврди Славко Велевски, претседател на ОИК-Могила.
Инаку во текот на вчерашниот ден во Битола правото на глас го остварија 87 болни и изнемоштени лица, во Демир Хисар 245, во Општина Новаци четири, и во Општина Могила на нивно барање гласаа четири болни и изнемоштени лица, информираа од пелагониските ОИК.
