Во Охрид сите избирачки места отворени навреме, гласањето се одвива непречено

Во Охрид денеска освен за вториот круг од претседателските избори граѓаните ќе гласаат и во вториот круг од предвремените избори за градоначалник, распишани поради смртта на градоначалникот Јован Стојаноски. Охриѓани ќе можат да се изјаснуваат меѓу двајцата кандидати кои во првиот круг освоија најголем број од гласовите.

Претседателот на ОИК, Климент Камнароски, изјави дека сите 88 избирачки места во Општина Охрид се отворени навреме, а гласањето се одвива непречено и без проблеми.

Според ОИК, на единствениот избирачки список во Општина Охрид за избор на градоначалник се запишани 52.273 гласачи, а за претседател 52.193. Разликата е поради запишаните гласачи во дијаспората.

Камнароски уште додаде дека во Охрид своето право на глас вчера го искористиле 155 болно лице, 19 затвореници гласале за претседател на државата, а шест за градоначалник. аб/сд/