Вардар директно во групите за Лигата на шампионите

Европската ракометна федерација (ЕХФ) ги објави имињата на 21 екипи кои добија директно место во групите од ЕХФ Лигата на шампионите за сезоната 2019/2020. На таа листа се најде и македонскиот шампион Вардар, кој е и актуелен европски првак.

„Црвено-црните” ќе играа во А или Б групата, кои според квалитетот се најсилни. На 27 јуни ќе биде извршена ждрепката кога ќе бидат и познати нашите ривали.

Според пропозициите на ЕХФ, на секоја земја и следува право на едно место во ЛШ за кое сепак националната федерација треба да се пријави. Доколку некој клуб сака да игра во групите од ЛШ, а не е првак тоа може да го стори со пријавување преку сопствената федерација. Потоа ЕХФ разгледувајќи осум други критериуми решава дали и тој клуб може да биде вклучен.

Од бројот на пријавени клубови потоа се одредува дали ќе има потреба од квалификации.

Останува истиот систем на натпреварување, со две групи со по 8 екипи, и плус уште две групи со по 6 екипи.

Дополнително место во ЛШ од Северна Македонија ќе бараат и Еурофарм Работник и Металург.