Велковски потпиша четиригодишен договор со Еурофарм Работник

Македонскиот ракометен вицепрвак Еурофарм Работник продолжува да се засилува за следната сезона. Битолскиот клуб денес договори уште еден репрезентативец, потпиша четиригодишен договор со Мартин Велковски.

Десниот бек доаѓа од Металург и ќе биде четврто засилување по Митревски, Маџовски и Ратајац.

-Велковски е ракометар кој има искуство од настапи во Лигата на шампионите и СЕХА лигата и ќе биде од голема помош за Еурофарм Работник. На оваа позиција во екипата се уште и Стјепановиќ и Михајло Петровски, соопштија од клубот.

Еурофарм Работник за неполна една недела ќе ги започне подготовките за сезоната 2019/20, а раководството на битолчани најави уште неколку засилувања.