Неиздавање фискални сметки и неможност за нивно скенирање може да се пријави на бројот 198

Неиздавање фискални сметки и неможност за нивно скенирање, се најчестите неправилности кои граѓаните ги пријавиле досега на дежурниот број 198 во УЈП во врска со спроведувањето на мерката МојДДВ односно повратот на 15 отсто од пресметаниот ДДВ.

Од 1 јули 2019 година, кога почна примената на мерката, најголем дел од пријавите се однесуваат на ресторани, маркети, мини маркети, колонијални продавници, фризерски студија и друго.

Некои правни лица се пријавувани и по повеќепати, а има и општини за кои граѓани тврдат дека речиси ниту едно правно лице не издава фискални сметки, соопшти УЈП.

Најмногу пријави за недоследности има на територијата на Скопје и тоа најчесто во општините Аеродром, Центар и Чаир.

Во Општина Аеродром на бројот 198 граѓаните пријавиле неиздавање на фискална сметка во продавници за храна, фризирско студио, кафе бар и други, каде што граѓани или не добиле фискална сметка или им била издадена невалидна.

Во Општина Чаир граѓани се пожалиле дека не добиле фискална сметка во слаткарница, механичарски сервис, бутик и други.

Во повеќе делови од Скопје пријавени се недоследности при издавањето на фискалните сметки од страна на механичарски сервис, гостилница, трафика, бутик, перална за автомобили,…

Во Општина Тетово граѓанин дојавил дека му била издадена фискална сметка за купен телефон, а неколку граѓани пријавиле дека фискални сметки не издаваат бензиска пумпа, неколку маркети и кафе барови.

Јавување за недоследности во повеќе продавници и кафе барови пријавиле и граѓани на Крива Паланка.

Управата за јавни приходи е известена за нерегуларности и во Општина Охрид. Фискална сметка не им била издадена во ресторан и на место каде се продавале билети.

Во Општина Прилеп, граѓаните се соочиле со неиздавање на фискални сметки во продавница за храна, како и со издавање невалидни фискални сметки од страна на мини маркет.

Во Општина Свети Николе, повеќе фискални сметки издадени во маркет биле со испрекинат бар код поради што не може да се вчита.

Бледи фискални сметки, со нечитлив бар код забележале и граѓаните од Битола, Куманово и од повеќе делови на Скопје за што пријавиле на 198.

Во Струмица пријавени се недоследности кај колонијал кој според пријавата на граѓани не издава фискални сметки, како и стовариште.

Од општина Дебар има реакции за неиздавање фискални сметки од страна на кафе барови и бутик.

На 198 граѓани пријавиле и нерегуларности при плаќање услуга во угостителски објект во Галичник.

Се почести се јавувањата за купување од продавници кои своите производи ги нудат и преку интернет, најчесто облека за што на граѓаните нарачаниот производ им се доставува без да им биде издадена фискална сметка.

Согласно пријавите и по службена должност, ќе бидат спроведени интензивни контроли со цел проверка и утврдување на фактичката состојба на терен, информираат од УЈП.