Продолжуваат акциите за есенско чистење во Скопје

Во рамките на есенските акции за чистење на скопските општини, ЈП „Комунална хигиена“ –Скопје денеска започна генерално чистење на општината Аеродром. Екипите на Претпријатието отстранија повеќе диви депонии настанати како резултат на неправилното одлагање кабаст отпад и градежен шут, а во текот на денот се спроведе рачно и машинско миење и метење на булеварите и улиците.

ЈП „Комунална хигиена“ –Скопје денеска заедно со учениците ги чистеше и дворовите на средните и основните училишта, а во ООУ „Блаже Конески“ беше организирано еко-предавање за правилно и совесно постапување со отпадот. На предавањето присуствуваа и претседателката на Советот на Градот Скопје, Љубица Јанчева, градоначалникот на општината Аеродром, Златко Марин, како и помошник -директорот на ЈП „Комунална хигиена“ –Скопје, Златко Христовски, коишто ја истакнаа важноста за развивање на еколошката свест кај најмладата популација за заштита на животната средина.