Ковид-19: Велигден во Италија во карантин, Словенија го достигна пикот

Според најновите податоци, во светот досега се регистрирани 1.615.092 лица заразени со новиот коронавирус. Од нив починати се 96.791, а оздравеле 362.542 луѓе.

– На Унгарија и се потребни повеќе респиратори и болнички кревети, изјави унгарскиот премиер Виктор Орбан. Според податоците, бројот на нови случаи на зараза во изминатите 24 часа се зголеми за 210 и сега има вкупно заразени 1190 лица. Од Ковид-19 починаа 77 луѓе. Меѓу новозаразените се и 151 лице од дом за нега на стари лица во Будимпешта. – Изгледа дека сите земји веќе го достигнаа врвот и дека се гледа светло на крајот на тунелот. Засега тоа не го гледам во Унгарија, рече Орбан.

– Словенија веројатно го достигна врвот на епидемијата на коронавирус, но треба да се почека со укинување на одредени рестрикции, посебно забраната за напуштање на матичните општини, изјави инфектологот Бојана Беовиќ.

– Од вчера во Шпанија починаа 605 заболени лица, со што вкупниот број смртни случаи во земјата се зголеми на 15.843. Бројот на новозаболени е намален на дневна основа. Во изминатите 24 часа има 468 новозаболени, што е најмалку од 11 март.

– Италијанската Влада одлучи мерките за изолација, кои изминуваат на 13 април да ги продолжи до 3 мај.

– Русија потврди рекорден број новозаразени со коронавирус. Од вчера позитивно се тестирани 1.786 лица, а вкупниот број заразени се искачи на 11.917. Во последните 24 часа починаа 18 болни од Ковид-19, со што смртниот биланс во таа земја изнесува 94.

– Велигденските празници во Италија годинава ќе бидат одбележани под мерки на општ карантин, во изолација, со строга контрола на копно и море, со надгледување со помош на дронови и хеликоптери за да се избегне собирање на луѓето за време на празниците. Жителите на Италија, каде досега од Ковид-19 починаа над 18.000 луѓе, Велики Петок го дочекаа во блокада, а Велигден ќе мине без јавни собири, како што е вообичаената прослава во Ватикан, додека поглаварот на Римокатоличката црква, папата Франциск ќе им се обрати на верниците преку телевизија и интернет.

– Новите истражувања покажуваат дека коронавирусот почнал да кружи во Њујорк кон средината на февруари, неколку седмици пред да биде потврден првиот случај и оти патници го донеле од Европа, а не од Азија, објави Њујорк Тајмс.