Вкупно 1270 ученици се запишаа во двата уписни рока во тетовските средни училишта

Секторот за јавни дејности при општина Тетово инфомира дека во вториот уписен рок на 24 и 25 јуни во тетовските средни училишта се запишале 186 ученици, од кои 128 на настава на албански јазик и 58 на македонски јазик. Севкупно во двата уписни рока се запишани 1270 или 64,8 отсто од учениците кои завршиле основно образование.

-Вкупно има запишано 995 ученици во наставата на албански јазик (62,6 отсто од завршени основци на албански јазик), 264 на македонски наставен јазик (77,4 отсто), и 11 на турски јазик (37,9 отсто). Остануваат високите критериуми за упис во средните училишта, истакна Ахмед Ќазими, раководител на општинскиот сектор за јавни дејности.

Основно училиште во тетовскиот регион завршиле 2060 деветоодделенци. Третиот уписен рок е во понеделник, 29 јуни.