Пендаровски -Бежоска: Побрзо да се обесштетат депонентите од „Еуростандард банка“

Сите надлежни институции да вложат максимални напори за обесштетување на депонентите, рече претседателот Стево Пендаровски на денешната средба со гувернерката на Народната банка, Анита Ангеловска-Бежоска која го информираше за затворањето на „Еуростандард банка“ АД.

Гувернерката го информираше Пендаровски и за активностите кои координирано и интензивно се преземаат за обесштетувањето на депонентите да почне во законските рокови, но и порано од тоа.

-Пендаровски и Ангеловска-Бежоска истакнаа дека е важно да се вложи максимум за поскоро отпочнување на исплатата на обесштетувањето на граѓаните од страна на Фондот за осигурување на депозити, и пред законски предвидениот рок од 20 дена, стои во соопштението од Кабинетот на Претседателот.

Пендаровски на средбата изрази очекување дека банкарскиот систем и понатаму ќе биде стабилен. Напомена и дека е особено важно Народната банка и натаму да продолжи со успешно остварување на своите законски цели и задачи, давајќи клучен влог за успешна монетарна политика, за финансиската и макроекономската стабилност на земјава.