Донација на Норвешката амбасада во заштитни средства за прилепските училишта, градинки, за ранливите категории граѓани

Преку невладината организација „Коалиција СЕГА“ се дистрибуира донација во вредност од речиси 23 000 евра во заштитни средства во прилепските основни и средни училишта, во центрите за деца со посебни потреби, за градинките, за ранливите категории граѓани, во прилепскиот Дом за стари лица „Киро Крстески-Платник“.

Ова е во рамките на проектот „Поддршка на маргинализирани групи кон превенција од COVID-19 во Прилеп“, финансиски поддржан од НВО Група 484 од Белград и Амбасадата на Норвешка во Белград. Проектот се спроведува со соработка со Општина Прилеп.

Според Зоран Илиоски, извршен директор на невладината Коалиција СЕГА, донацијата на норвешката амбасада е добредојдена во вистински час.

– Прашањето беше како да помогнеме во оваа ситуација, посебно на младите и на ранливите категории граѓани. Ја искористивме можноста што ни ја пружи Норвешката амбасада со седиште во Белград и невладината организација, групата „484“ кои не поканија за да обезбедиме поддршка за нашите граѓани. Заедно со прилепската локална самоуправа направивме план како да ја направиме донацијата. Вкупната донација е поделена на неколку дела: средства за дезинфекција на раце, тоа се 660 пакувања кои ќе бидат поделени, 4 400 пакувања на антибактериски течен сапун, заштитни медицински маски од кои 10 000 ќе ги поделиме меѓу ромското население и 5 000 во училиштата, на влезот на секое училиште ќе има диспанзер за дезинфекција на рацете, во сите 15 основни и средни училишта се распределени термометри, изјави Илиоски.

Тој информира дека во текот на идната недела во населбата Тризла ќе распределат средства за дезинфекција и заштитни маски.

-Паралелно, заедно со Општината имаме онлајн кампања за информираноста на младите и другата популација за заштита, вели Илиоски, повикувајќи ги компаниите да се вклучат во ваквиот вид кампања за заштита на младите и на населението.