Макпетрол: РКЕ покажува целосна нестручност и недоволно познавање на пазарот со нафтени деривати

Регулаторна комисија за енергетика и водни услуги на Република СМакедонија (РКЕ) повторно покажува нестручност и недоволно познавање на пазарот со нафтени деривати и горива за транспорт и тоа се покажува преку нивното последно соопштение.

Писменото соопштение од Макпетрол АД го пренесуваме во целост:

ПИСМЕНА РЕАКЦИЈА НА ВЧЕРАШНОТО СООПШТЕНИЕ НА РКЕ

Регулаторна комисија за енергетика и водни услуги на Република С.Македонија (РКЕ) повторно покажува нестручност и недоволно познавање на пазарот со нафтени деривати и горива за транспорт и тоа се покажува преку нивното последно соопштение.

Имено, крајна невистина е дека Макпетрол АД не доставил соодветна документација со коja би се поткрепило барањето. Напротив, Макпетрол АД ја достави потребната документација и истото беше констатирано од страна на РКЕ. Во случај да им беше потребна дополнителна документација на членовите на РКЕ истата ќе им беше доставена. Овој незаинтересиран, однос само покажува на отсуството на волја овие прашања да бидат решени.

Што се однесува за либерализација на пазарот односно, слободен пазар при формирање на цените на нафтените деривати, ставот на РКЕ е сосема контрадикторен. Поточно нивното нeосновано мислење дека либерализираните пазари ќе имаат 20% повисоки малопродажни цени се коси со образложението на предметната одлука, каде се констатира токму спротивното и споредбата ја прават токму со тие држави кои имаат либерализирани пазари за нафта и нафтени деривати.

По ова прашање единствено е неспорно дека во нашата држава еден период трговците сами ги определуваа цените и не се предизвика никаков финансиски шок.

РКЕ иако тврди дека не е надлежна по ова прашање, нејасно од кои причини сепак го искажува своето негативно мислење во однос на либерализацијата на пазарот, а притоа имајќи во предвид дека во сите земји од Европа, вклучително и земји од регионот, пазарот со нафта и нафтени деривати е либерализиран.

По дадените изјави очигледно е дека РКЕ воопшто и не го познава пазарот штом зборуваат за монополска позиција. Имено, РКЕ има издадено повеќе од 70 лиценци за трговија со нафта и нафтени деривати, со кои лиценци слободно може се купуваат нафтени деривати во државата и од странство. Исто така, на пазарот во државата постојат повеќе од 400 бензински станици со што крајно неаргументирано е тврдењето дека постои монополска позиција.

Доколку РКЕ има индиции за монополска позиција, треба да знае и има должност истата да ја пријави во Комисијата за заштита на конкуренцијата.

Дали РКЕ се водеше од интересот на потрошувачите кога ја определуваше цената на струјата и дали РКЕ се води од интересите на граѓаните, ако имаме во предвид дека цената на природниот гас последната година значително се намали, а притоа цената на топлинската енергија остана непроменета?

Разбираме дека преку цената на енергенсите треба да се овозможи и развој и инвестиции за во иднина, но очигледно дека вака поставената политика во однос на цените на енергенсите од страна на РКЕ на РСМ, трговците со нафтени деривати ги става во понеповолна позиција во однос на производителите, транспортерите и трговците со електрична енергија.

По овие несериозни и нестручни одлуки и ставови на РКЕ останува нејасно кон каков пазар се насочува комисијата?

На ова соопштение реагираат од РКЕ.

Регулаторната комисија за енергетика и водни услуги (РКЕ) ја известува јавноста дека пред да биде донесена Одлука за густини и маржи на нафтените деривати во текот на месец август од страна на поголемите трговци беа доставени одделни барања за промена за зголемување на маржата кај одделни нафтени деривати. Единствена причина поради која беа поднесени барањата за зголемување на маржата е за да им се врати ликвидноста која им е ослабена поради намалената потрошувачка на нафтените деривати. Од страна на компанијата Макпетрол АД Скопје беше доставена споредбена анализа за трендот на потрошувачката од првите месеци од 2020 во споредба со истиот период од 2019 година. Од страна на другите компании немаше доставено анализа, само доставија барање за зголемување на маржата кај одделни нафтени деривати.

Факт е дека поради пандемијата последиците се рефлектираат и во економските биланси. За санирање и амортизација на последиците, во однос на антикризни мерки ве упатуваме кон креаторот - Владата.

Остануваме отворени за соработка во рамките на нашите надлежности и во моментот кога и доколку стигнат анализи, повторно од страна на РКЕ ќе биде разгледано ова прашање и ќе се донесе соодветна одлука, се наведува во реакцијата на соопштението од Макпетрол АД.