Пореч домаќин на 56. Европското првенство во карате

Извршниот комитет на Европската карате федерација (ЕКФ) одлучи сениорското европско првенство во 2021 година да се одржи во Пореч, Хрватска. Во предвид беа земени повеќе значајни параметри при изборот на нов домаќин, откако Гетеборг ја откажа организацијата на најголемиот континентален настан во каратето поради штетите предизвикани од пандемијата од коронавирусот.

ЕКФ дефинираше прецизни параметри со цел да се обезбедат што е можно повеќе услови за одржливост на настанот, земајќи ги предвид однапред утврдените барања, како што се локацијата до Централна Европа (полесен пристап за поголем број земји), искуството во одржување настани под посебни околности на COVID-19 и слободниот пристап до земјата без оглед на пандемијата или политичката ситуација во Европа во сегашно време.

Покрај Хрватска, кандидати за организација на ЕП 2021 беа уште и: Азербејџан, Бугарија, Полска и Шпанија.

Европско првенство ќе се одржи од 19 до 23 мај 2021 година и ќе биде дел од бодувањето за светската ранг-листа.