Во Тетовско казни за горење отпадно масло што емитува канцерогени материи за автомеханичарски сервиси

Важно е да потенцираме дека само два сервиси од петте кои беа предмет на надзор имаа валидни транспортни формулари кои ги доставија на увид до инспекторите.

Државниот инспекторат за животна средина објави дека на 15 декември тим на државни и овластени општински инспектори за животна средина од Скопје и Тетово извршија вонреден надзор во пет автомеханичарски сервиси во Тетово и Теарце, при што се изречени и казни. Целта на овие надзори била да се утврди начинот на постапување со отпадното масло, заменетите филтри и друг вид опасен отпад.

– Важно е да потенцираме дека само два сервиси од петте кои беа предмет на надзор имаа валидни транспортни формулари кои ги доставија на увид до инспекторите. Тие формулари се пополнуваат при секое преземање на отпадните масла, на нив се гледа количината на отпадното масло, која фирма го презема и каде се носи на третман.Кај два сервиси, се констатираше дека отпадното масло се предава на правно лице што поседува дозвола за транспорт на опасен отпад и утврдено е дека маслото не се гори на овие локации, информираат од Инспекторатот.

Според нивните информации во еден од сервисите, увидот покажал дека повеќе тони отпадно масло се складираат на самата локација, односно дека тоа не се предава на правното лице со кое е склучен договор за преземање и транспорт на опасниот отпад.

– Резервоарот за екстра лесно масло за горење што се наоѓа во подрумските простории беше празен, а во моментот на надзорот започна негово полнење од цистерна која пристигна на локацијата. На увид беа доставени податоци за горивото. Беше утврдено дека отпадното масло ниту се гори, ниту се продава и на овластеното лице му беше укажано дека мора да го обнови постојниот договор за транспорт на отпадно масло или да склучи нов во рок од седум дена, соопштуваат од Инспекторатот.

Оттаму потенцираат дека во два сервиси, каде не биле доставени транспортни формулари за преземање и транспорт на отпадно масло за 2020 година, на локациите маслото не се чувало на соодветен начин.

– Во еден од двата сервиси беше утврдено дека отпадното масло се гори. Горењето на отпадно масло емитува канцерогени материи. Ова правно лице ќе добие законски утврдена казна.Сите пет сервиси кои беа предмет на надзор не постапуваат соодветно со отпадни филтри и беа задолжени опасниот отпад да го селектираат и предаваат на овластени компании, информираат од институцијата.

Надлежност за вршење надзор врз автомеханичарски сервиси имаат овластените општински инспектори за животна средина. Државниот инспекторат ќе ги задолжи општинските инспектори од цела држава да во најкус можен рок спроведат итни надзори над сите автомеханичарски сервиси за да спречат или санкционираат горење и продавање на отпадно масло.