МЗЗПР: безбедни и здрави работници се од интерес и на работодавачите и државата
Потребен е нов закон за безбедноста и здравје при работа (БЗР), а колку повеќе во работниот процес има работници со повреди или професионални заболувања, ќе има и отсуства од работа, зголемени трошоци и намалена продуктивност. Сето ова негативно се одразува врз работниците, како и на работодавачите и севкупниот економски систем на државата.
Од Македонското здружение за заштита при работа (МЗЗПР) велат дека новиот закон треба да биде јасен и недвосмислен во практичната примена и треба да ги земе предвид мислењата на сите заинтересирани страни од областа на БЗР.
„Во овој процес ги ставаме на располагање сите наши капацитети, знаење и искуство. Сугерираме процесот на прилагодување на промените во БЗР законодавството и неговото усогласување со ЕУ да започне што побрзо, особено ако се имаат предвид новите ризици на работните места кои произлегуваат од Ковид-19 пандемијата. Тоа изискува и ревизија на проценките на ризик на сите работни места каде има опасност од заразување со новиот коронавирус.“, истакнуваат од најстарото професионално здружение кое е формирано во 1964 година.
Од МЗЗПР посочуваат дека 12 години по практичната примена на Законот за БЗР и другите релевантни правни акти како клучни области во кои треба да се насочи идното делување покрај реформата на законската рамка и политиките за БЗР се: образованието, зајакнувањето на капацитетите и подигнување на свеста за БЗР, како и воспоставување ефикасни евиденции за повреди, несреќи при работа и професионални заболувања.
„Од економски аспект гледано секој работодавач или инвеститор, својот интерес го гледа во профитот. Но, дури и за остварување на таа цел, единствено заштитен работник може да биде продуктивен, односно само здрав и мотивиран работник може да произведе квалитетен производ или да даде квалитетна услуга. За здрав и мотивиран работник неопходно е работодавачот да преземе превентивни мерки и активности за безбедност и здравје при работа. Мотивиран работник произведува квантитет и дава квалитетни услуги. За да имаме мотивиран работник, работодавачот потребно е истиот соодветно да го награди со плата и други надоместоци кои му следуваат, вклучувајќи го тука процесот на подобрувањето на безбедноста и здравјето при работа. Истовремено, потребна е и директна финансиска помош од страна на државата во стимулирање на превентивниот аспект на БЗР на ниво на компании.“, посочува Милан Петковски, претседател на МЗЗПР.
Со цел давање и на конкретен придонес во подобрувањето на законодавството, превентивата и целокупната примена во сферата на БЗР и со подршка на Европска Унија,
Македонското здружение за заштита при работа (МЗЗПР) во соработка со Асоцијација за правно-економски истражувања и едукација „Јуридика“ неодамна ја издадоа публикацијата „Безбедност и здравје при работа – Мониторинг на состојба“.
Оваа публикација нуди конкретни препораки и е достапна на следниот линк: http://mzzpr.org.mk/wp-content/uploads/2020/11/%D0%91%D0%97%D0%A0-%D0%9C%D0%BE%D0%BD%D0%B8%D1%82%D0%BE%D1%80%D0%B8%D0%BD%D0%B3.pdf
