Елтон Џон и Мајкл Кејн во реклама за охрабрување на вакцинацијата против Ковид-19

Двајца од можеби најпознатите британски уметници, пејачот Елтон Џон и глумецот Мајкл Кејн ги здружија силите за комична реклама, со цел охрабрување на своите обожаватели да се вакцинираат против Ковид-19.

Во рекламата Џон (73), го пародизира својот раскошен углед, а Кејн (87) се потсмева сам себе повторувајќи го славниот слоган што го користат безброј негови имитатори – „Не многу луѓе го знаат тоа“… Велика Британија досега ги достави првите дози на вакцината на повеќе од 12,6 милиони луѓе и е на добар пат, до 15 февруари да ја постигне целта од 15 милиони вакцинирани од четирите главни приоритетни групи – вклучително и оние луѓе над 70 години.

Сепак, постои загриженост дека некои луѓе ќе избегнуваат вакцина поради дезинформациите и теориите на заговор.

Во рекламниот спот, Елтон Џон се преправа дека е на аудиција за улога во рекламата. Жирито притоа го критикува за неговите актерски способности и оти бил „премногу шоубиз“, а пејачот потоа го имитира Кејн. Потоа ги убедува дека ја примил вакцината, па запева една од неговите хит-песни, „I’m Still Standing” (Јас сè уште стојам), на што режисерот му вели – „Благодарам, Елтон, ќе ти се јавиме“.