Општина Куманово објави оглас за избор на компанија за изградба на кружен тек

Општина Куманово објави јавен оглас за избор на компанија за изградба на кружен тек на крстосница помеѓу булеварите „Октомвриска револуција” и „Трета Македонска Ударна Бригада”. Проценетата вредност за изведување на градежните активности е 30.508.400.00 денари, соопштија од одделението за јавни набавки.

Според објавата, економските оператори треба да достават дозвола за изведување на градежни активности издадена од Министерството за транспорт и врски, да имаат соодветна механизација, да располагаат со стручен и квалификуван кадар. Најниската цена е пресудна за избор на компанијата. Отворањето на понудите е на 20 април годинава во просториите на општината.

Изградбата на два кружни тека во Куманово е предвидена во развојната програма која ја изгласа Советот на една од седниците кон крајот на мината година. Покрај изградба на кружните текови, предвидено е и проширување на сообраќајните ленти, тротоарите.

Претходно во Куманово, прв пат во 2019 година беше изграден кружен тек на влезот од градот помеѓу булеварот „Трета МУБ” и улицата „11 Октомври” за што од општинскиот буџет беа одвоени 19,7 милиони денари.