Еурофарм Пелистер – Вардар во финалето на Македонскиот ракометен куп

Битолски Еурофарм Пелистер славеше вечерва убедлива победа над екипата на Бутел од 38:23 (16:9) и в сабота ќе игра против големиот ривал Вардар 1961 во финалето на овогодишното издание на Македонскиот куп во ракомет.

Ракометарите на Бутел одржуваа резултатска неизвесност против фаворитот само во воведните 15-ина минути, кога Еурофарм Пелистер при резултат 7:7 влезе во серија од 9:2 и веќе на полувреме ги реши сите дилеми околу вториот патник во куп финалето.

Македонскиот репрезентативец Бојан Маџоски со седум и хрватскиот интернационалец Стипе Мандалиниќ со шест голови беа најефикасни во редовите на Еурофарм Пелистер.

Претходно денеска, Вардар во првото полуфинале беше убедлив против бранителот на куп трофејот Металург (27:22), предводен од хрватскиот репрезентативец Иван Чупиќ со седум голови и Борко Ристовски со 13 одбрани.

Финалето од Македонскиот ракометен куп ќе се игра в сабота во салата „Автокоманда“ во Скопје со почеток од 17:30 часот.