Општина Илинден информира дека континуирано работи на реализација на проектот „Чистење, нивелирање и одржување на отворените одводни канали“ со кој се опфатени отворените одводни канали кои се дел од мелиоративниот систем „Скопско Поле“, кој се протега на територијата на пет општини Илинден, Гази Баба, Арачиново, Петровец и Зелениково.

– Од почетокот на годината досега, во кординација со „Водостопанство Скопско Поле“-Скопје, исчистени се вкупно 7300 метри од каналската мрежа. Извршено е машинско чистење на Ободен канал што минува низ локалната економска зона „Стопански комплекс“ Илинден и локалната екомска зона „Карагач“ во должина од 3.000 метри, машинско чистење на терцијален канал сисавец на Топлик во населба Илинден во должина од 1.000 метри, терцијален канал сисавец на Топлик во локалната економска зона Ограѓа во должина од 1.300 метри, машинско чистење на сисавец на Главен канал во локалната економска зона Марино-Кадино, во должина од 700 метри и машинско чистење на сисавец на Главен канал во Илинден, во должина од 1.100 метри. Од страна на ЈКП „Илинден” извршено е косење и уредување на терцијалните канали во должина од 2.500 метри – информираат од прес-службата на Општина Илинден.

Од општината соопштуваат дека во рамки на проектот „Изградба и подобрување на систем за зафаќање и одведување на атмосферските води“ изграден е и нов канал во должина од 200 метри во локалната екомска зона Ограѓа за одведување на атмосферските води во каналот Топлик.

Оттаму посочуваат дека поради рамничарскиот терен на којшто се наоѓа општината, подложен на покачување на нивото на подземните води, континуирано се врши уредување, чистење, нивелирање и одржување на отворените одводни канали кои што се во должина од 120 километри.

– Водениот надомест за редовното одржување, чистење и нивелирање на отворените одводни канали во име на граѓаните како корисници на овие објекти од јавен интерес го плаќа Општината. Таа обврска локалната самоуправа ја презема уште од 2010 година. Со оглед на тоа што каналите се објекти од јавен интерес, според урбанистичките планови, на овие површини не смее да се изведуваат градби или да се вршат работи со кои се загрозува стабилноста на одбранбените насипи – се вели во општинското соопштение.



Автор: Администратор
Објавено на: 31/05/2021 13:48