Отворен Музеј за ретки минерали во Пробиштип

Во Пробиштип денеска свечено е пуштен во употреба Музеј на ретки минерали, единствен во земјава. Општината која е препознатлива по рударството, отсега ќе има и Музеј во кој ќе биде изложена импозантна збирка со над 250 експонати, односно минерали како од регионот, така и од цел свет.

Според Градоначалникот на општината, Драган Анастасов со овој музеј ќе се овозможи развој на туризмот, но и бенефит од едукативен аспект во источниот регион.

– ОНА ШТО СЛЕДУВА Е ПРЕДАВАЊЕ НА ОБЈЕКТОТ ПОД УПРАВУВАЊЕ НА ДОМОТ НА КУЛТУРА „ЗЛЕТОВСКИ РУДАР”, КОЈШТО ВО СОРАБОТКАТА СО МИНИСТЕРСТВО ЗА КУЛТУРА ЌЕ ГИ СПРОВЕДЕ СЛЕДНИТЕ ЧЕКОРИ ЗА НАЧИНОТ НА РАБОТА И НЕПРЕЧЕНО ФУНКЦИОНИРАЊЕ НА МУЗЕЈОТ, ВЕЛИ АНАСТАСОВ.

На отварањето присуствуваа и министерот за локална самоуправа, Горан Милевски и директорката на Центарот за развој на Источно планскиот регион, Зујица Ангелов.

Министерот за локална самоуправа, Милевски истакна дека му е задоволство што денеска се финилизира проектот и може да се пушти во употреба.

– СЕГА ЗА ПРВПАТ ВО ПРОБИШТИП ИМАМЕ ВАКОВ МУЗЕЈ, КОЈ ЌЕ БИДЕ И ЕДИНСТВЕН ВО ДРЖАВАТА, А ВО КОЈ ЌЕ БИДАТ ИЗЛОЖЕНИ РЕТКИ МИНЕРАЛИ ОД ЦЕЛА ДРЖАВА, А ОВА ЌЕ БИДЕ ЕДИНСТВЕНО МЕСТО, КАДЕ ШТО УЧЕНИЦИТЕ И СИТЕ ТУРИСТИ ЌЕ МОЖАТ ДА ГИ ВИДАТ БОГАТСТВАТА НА ОВАА ДРЖАВА. СО ЗАДОВОЛСТВО ГИ ФИНАНСИРАВМЕ ОВОЈ ПРОЕКТ, ВЕЛИ МИЛЕВСКИ.

Вкупната инвестиција за изградба на Музејот на ретки минерали е 9,2 милиони денари, од кои 62 проценти се обезбедени преку Бирото за рамномерен регионален развој, а останатите средства од буџетот на општината.