Минусните температури ноќеска предизвикаа голомразица на струшките улици

Минусните температури, кои во Струга ноќеска достигнаа до минус три степени целзиусови, предизвикаа голомразица на улиците. Граѓаните револтирани дека градските служби не интервенирале со сол и песок, а од Општина Струга велат дека се превземани сите соодветни мерки и е интервенирано на градските улици.

– Општина Струга, преку фирмите, кои го имаат тендерот за одржување на улиците во зимски услови ги превзема сите потребни мерки со фрлање сол и песок и надминување на проблемот со голомразицата синоќа, посочи општинската прес-служба.

Снегот што падна во текот на вчерашниот ден, според стружани, беше со слаб интензитет во градската средина и немаше потреба од интервенции со механизација, но ниската температура во текот на ноќта резултираше со подмрзнување на коловозите и тротоарите.

– И покрај тоа што се соочивме со потешкотии во непречено и безбедно движење до 20 часот и 30 минути немаше никаква забележителна активност за попесочување на градските улици, реагираат стружани.

Во Програмата за зимско одржување на локалните патишта и улици на општина Струга за 2021/2022 година, од 15 ноември годинава до 15 март идната година предвидени се 6,5 милиони денари за чистење и попесочување со индустриска сол и абразивен материјал во услови на снег и мраз.