Пет ризици за светската економија во 2022 година
Во текот на следната година земјите ќе мора да обрнат големо внимание на овие пет ризици доколку не сакаат глобалната економија да претрпи огромен удар.
Во моментов, меѓународните економски кругови се фокусираат на можните ризици за светската економија и светската трговија во 2022. Кога ќе ги погледнеме меѓународните написи и извештаи подготвени од познати финансиски институции, станува јасно дека пет главни ризици доаѓаат до израз.
Омикрон
Првиот ризик е новата варијанта на коронавирусот Омикрон и нови одлуки за затворање бизниси. По објавувањето дека првиот пациент починал во Велика Британија како резултат на оваа варијанта, повторно се појавија прекумерни ограничувања, карантини и целосно затворање на граничните премини во многу европски земји. Се вели дека некои земји веќе разговараат за воведување мерки од 1 или 3 јануари 2022 година, а особено за преземање конечни мерки пред божиќните празници.
Многу европски земји, особено Франција, почнаа да зборуваат за враќање на работа од далечина два или три дена во неделата. Истражувањата спроведени во многу водечки земји во изминатите шест месеци за професионалниот живот покажуваат дека дури и ако пандемијата заврши, луѓето ќе бараат работата од далечина да трае најмалку два дена во неделата. Меѓутоа, во случај на затворање на училиштата и строги одлуки за карантин, ова повторно значи губење на приход во услужниот сектор ширум светот, ризик што сериозно ќе ги ограничи економиите на земјите, растот, вработувањето и јавните финансии.
Индекс на потрошувачки цени
Вториот критичен ризик е оној на високата глобална инфлација, која се очекува да продолжи до средината на пролетта следната година. Стапката на раст на индексот на потрошувачките цени (CPI) во САД се очекува да достигне 7% на крајот на 2021 година и ќе остане на тоа ниво до почетокот на април. Иако годишната вкупна инфлација се очекува да се намали во значителен број земји од Г7 до средината на летото 2022 година, ризикот од глобалната инфлација поради светските цени на суровините, трошоците за земјоделство и храна, енергија и логистиката е значаен проблем.
Стагфлација
Во оваа ситуација, се јавува третиот важен ризик за 2022 година: стагфлација (термин од макроекономијата, кој се однесува на состојба на економијата која се карактеризира со низок економски раст, зголемена инфлација и зголемена невработеност). Се тврди дека ако глобалниот ризик од инфлација предизвика несогласување меѓу централните банки, особено Федералните резерви на САД (ФЕД), Европската централна банка (ЕЦБ) и другите, „јастребите“ ќе надвладеат над „гулабите“ со нивните барања за заострување на монетарната политиката може да предизвика стагфлација со висока инфлација, тешка рецесија и висока невработеност.
Загриженост поради Кина и Русија
Четвртиот критичен ризик може да дојде од Кина и Русија. Најкритичниот проблем е неподготвеноста на Кина, како најважен снабдувач во светската трговија, да дистрибуира суровини, ретки метали, полупроизводи и крајни производи за да ги задоволи потребите на светската економија и нејзиното „губење апетит“ за задоволување на туѓите потреби.
Од друга страна, поради можните чекори што Русија може да ги преземе во однос на Украина, тензиите што ќе се зголемат меѓу Русија и Европската унија и меѓу Русија и САД, несомнено ќе се одразат на регионалната и светската трговија, како и на светската економијата во целина.
Фискална политика
Конечно, петтиот ризик е стеснувањето на фискалните политики на земјите. Во 2022 година, многу водечки земји мора да ги намалат буџетските дефицити и да го забават растот на јавниот долг. Ова, пак, може негативно да влијае на растот, вработувањето и можностите за јавна социјална поддршка на државите.
