„Божикна серенада“ – нов народен, културен и духовен проект во пресрет на Рождеството Христово

Традицијата за возобновување на Божикни песни, по идеја на Бигорскиот манастир и со благослов на владиката Партениј, продолжува и оваа година.

Никола Перевски -Пере Нокаут, Влатко Лозаноски – Лозано, Стефан Филиповски – Некст тајм и Димитар Андоновски, се веселите коледари во новата, шеста по ред возобновена Божикна песна што раскажува за една млада девојка, опеана како гулабица, која се успала за празничната Богослужба, па коледарите низ серенада ја будат, опоменуваат, информираат од Здружението за возобновување на православни традиции.

И шестата по ред возобновена Божикна каланда (песна), во себе го носи специфичниот византиски богат мелос. Возрасните коледари одат од куќа до куќа и ја пеат не само за Бадник, туку и низ целиот седумдневен празничен период, заклучно со Св.Василиј и Нова Година. Тие весело ги повикуваат домаќините да одат во црква, таму да го прослават Раѓањето Христово и потоа да го понесат големиот благослов дома.

За неколку дена, „Божикната серенада“, ќе добие и видео запис како сведоштво за мисијата на Бадниковите поворки како народен, културен и духовен проект. Аудио записот за „Божикна серенада“, е снимена во студиото Алшар во Скопје.