На една од можеби најромантичните холивудски љубовни приказни ѝ дојде крајот – Џејсон Момо и Лиза Боне на Инстаграм објавија дека се разведуваат.

„Сите го чувствуваме притисокот и промените во овие времиња… Револуцијата се случува и нашето семејство не е исклучок… Тоа се чувствува и расте од сеизмичките промени што се случуваат… И така – ги споделуваме нашите семејни новости – да се разделиме“, се вели во објавата.

Тие истакнуваат дека не го споделуваат ова затоа што вреди да се објави на вести, туку за да можат „достоинствено и чесно да продолжат“ со животот. – „Нашата посветеност е непоколеблива кон животот на овој свет и кон нашите деца. Нека преовладува љубовта. Џ и Л“, пишува на крајот од соопштението.

Двајцата се запознале во џез-клуб во 2005 година. Момоа (42) славата меѓу другото ја стекна со улогата на Кал Дрога во серијата „Игра на тронови“, а 12 години повозрасната Боне е позната по улогата на Дениз Хакстабл во серијата „Козби шоу“ која се емитуваше во 1980-тите. Се венчаа во 2017 година. Заедно имаат две деца – девојче и момче. Боне претходно беше вo брак со пејачот Лени Кравиц, со кого ја има ќерката – исто така глумица, Зои Кравиц.



Автор: Администратор
Објавено на: 14/01/2022 13:27