Бабиќ пред средбата со Татабања: Да останеме фокусирани, математички се уште не го обезбедивме осминафиналето

Тренерот на Еурофарм Пелистер, Жељко Бабиќ, побара од своите избраници максимален сериозен пристап на претстојниот натпревар со Татабања на кој битолчани се фаворити.

– Ништо не е готово, уште сè е отворено. Имаме уште две кола, а математички уште не го обезбедивме ни осминафиналето. Така да мораме да останеме фокусирани, ментално цврсти, да размислуваме секој за своите задачи и да го потврдиме тоа што нè краси – тимската игра. Татабања е одличен и подвижен тим. Имаат технички добри ракометари кои играат „еден на еден“, а имаат и одличен тренер. Точно е дека немаат шанси за осминафинале, но имаа проблеми во клубот и затоа се малку подолу на табелата. Сепак, заслужуваат респект и ни следи баш европски натпревар.

Натпреварот Татабања – Еурофарм Пелистер е закажан за утре (1 март) со почеток во 18:45 часот на теренот на унгарскиот тим.

По осум кола во Д-групата од Европската лига, Еурофарм Пелистер е втор со 10 бодови, Татабања е последна (6. место) со четири освоени бода.