Жанг Џун: Кина го поддржува директниот дијалог меѓу Русија и Украина

Постојаниот претставник на Кина во ОН Жанг Џун ги повика сите страни во украинскиот конфликт да покажат воздржаност и нагласи дека конфликтот може да се реши со дијалог.

„Кина го поддржува директниот дијалог и преговорите меѓу Русија и Украина, што е одлучувачки начин за решавање на проблемот“, рече кинескиот дипломат на седницата на Советот за безбедност на ОН посветена на ситуацијата во Украина.

Тој посочи дека светската заедница треба да придонесе за создавање поволни надворешни услови за политичко решение и да се избегне ескалација на тензиите.

Според кинескиот амбасадор, дејствувањето на Советот за безбедност на ОН треба да биде конструктивно, а не да доведе до дополнителна ескалација.

Жанг нагласи дека во моментов е исклучително важно на секој можен начин да се избегнат цивилни жртви и да се спречи голема хуманитарна криза во Украина.

„Според нас, Обединетите нации и меѓународната заедница треба да обезбедат хуманитарна помош во согласност со принципите на хуманост, неутралност и непристрасност, утврдени во Резолуцијата 46/182 на Генералното собрание и да избегнуваат нејзина политизација“, нагласи кинескиот амбасадор.