Санација на улиците и обнова на сообраќајната сигнализација на улиците во општина Ѓорче Петров

Екипите на ЈП Улици и патишта Скопје во рамките на големата пролетна акција во општина Ѓорче Петров денес ги санираа оштетувањата на улица Волковска, улица Лепенец и улица Лука Геров во површина од 70 метри квадратни, како и оштетените бехатон плочи на пешачките патеки на улицата Лука Геров во површина од 10 метри квадратни.

На семафоризираните крстосници во општина Ѓорче Петров заменети се оштетените сенила на семафорите и тоа на крстосниците на улица Ѓорче Петров со улица Исаја Мажовски, со улица Македонски Војски, улица Сремски Фронт и на крстосницата со улица Атанас Иљовски. Со почетокот на ноќното обележување во текот на изминатата ноќ обележани се такси станиците на булеварот Партизански Одреди и на улица Радушка, а денес во текот на вечерните часови екипите продолжуваат со машинското обележување на надолжните линии на улица Ѓорче Петров.

По налог на Град Скопје екипите продолжуваат со извршување на наредните активности на улиците и булеварите во општина Ѓорче Петров кои се предвидени за работа во рамките на пролетната работна акција.