Последните врнежи го задржаа доброто ниво на вода во акумулациите во Струмичко

Последните врнежи го задржаа доброто ниво на вода во сите акумулации во Струмичко. Во нив има доволно количина вода за пиење и наводнување, а површините од околу 2 илјади хектари се наводнуваат континуирано.

Според последните мерења, двете најголеми брани „Турија“ и „Водоча“ се повеќе од половина полни.

-Во „Турија“ имаме 32 милиони метри вода од вкупно 50 милиони, а во „Водоча“ има над 14,5 милиони од вкупен капацитет од 26 милиони кубни метри вода. Помалите акумулации „Маркова река“, „Иловица“ и „Новоселка“ се полни информира Лазо Ѓоргиев, директор на АД Водостопанство на Македонија-Подружница „Струмичко Поле“, Струмица.

Според него, наводнувањето се одвива непречено, а тековните дефекти се отстрануваат што е можно побргу. Апелира до земјоделците совесно да се однесуваат кон водата и по завршувањето на наводнувањето да ги затвораат вентилите од системот за наводнување.

Со постојните количини вода, посебно во браната „Турија“, не е доведено во прашање редовното снабдување на градот со вода, но сепак Ѓоргиев потсетува на рационално трошење и водата да не се употребува за полевање.

Тој апелира до земјоделците и несовесните граѓани да не ги затнуваат одводните канали и речните корита со фрлање на земјоделски отпад, како што e со коритото на Иловичка река, на излезот од селото Иловица, но и на другу локации, кои во случај на поголеми врнежи можат да предизвикаат поплавување.