Ново основно училиште во Илинден

Општина Илинден доби ново основно училиште кое ќе биде пуштено во употреба на почетокот на новата учебна година.

Станува збор за високоенергетски ефикасен објект, со иновативен пристап и воведени нови технологии и еколошки материјали, со греење и ладење со алтернативни извори на енергија, опремено според највисоките безбедносни стандарди.

Ова го најави градоначалникот на Општина Илинден, Александар Георгиевски при набавената обиколка на централните и подрачните основни училишта, градинката и средното стручно училиште по повод почетокот на новата учебна година.

-Училиштето располага со 14 училници, наставничка канцеларија, конференциска сала, пет тоалети како и три простории за кујна со трепезарии. Сите простории се опремени со потребниот инвентар според највисоките нормативи и стандарди. Карактеристично за новото училиште е тоа што има и сензорна соба за поголема инклузија на децата со попреченост. Основните придобивки од отворање на ова училиште се модернизирање и проширување на просторните капацитети, како и воведување настава со продолжен престој за учениците од прво одделение и обезбеден топол оброк, истакна градоначалникот Георгиевски.

Воедно, надворешниот дел на објектот е хортикултурно уреден, поставена е фекална и атмосферска канализација, извршен е приклучок на училиштето на водоводниот систем, изградена е нова трафостаница која го снабдува со стабилен и квалитетен електричен напон училиштето, поставени се канделабри за осветлување, инсталиран е оптички интернет, извршено е заштитно оградување на училиштето како и изградени се два паркинг простори, еден за родители и еден за вработените во училиштето.

При направената обиколка, како што наведуваат од Општина Илинден било констатирано дека сите училишта подготвени ќе ја отпочнат новата учебна година и се спремни просторно, како и со воспитно-образовен кадар кој во целост ќе ја спроведе предвидената образовна програма за учениците.

При тоа, во централното ООУ ,,Ристо Крле” во Кадино, се опремени три кабинети со смарт табли, опремен е кабинет по музичко образование со дигитално пијано, поставен е електронски информатор во холот на училиштето, изведено е молеро-фарбарско уредување, а уреден ие паркинг простор за да се подобри безбедноста на движење.

Во подрачните училишта во Мралино и Бунарџик реновирани се тоалетите, уреден е влезот на училиштето со заштитна ограда и пристапен влез за лица со инвалидитет, уредени се дворните површини и детското игралиште.

– Интензивно се работеше и во останатите училишта во делот на инфраструктурата, како и осовременување и унапредување на квалитетот на воспитно-образовниот процес- се наведуваво соопштението на Општина Илинден.