Бараше професионалци, најде партиски членови: Арсовска со кадри од ДУИ и ГРОМ ќе раководи со град Скопје

Денес се назначени новите в.д директори на Јавните претпријатија во Скопје.

Со ЈП Лајка назначена е да раководи Радмила Пешева, додека со ЈП Улици и патишта Саид Саид. На в.д директорската позиција во ЈП Паркинг назначен е Крсте Петревски, во ЈП Паркови и зеленила Реџепи Зухејр, додека со ЈП Дрисла назначен е Александар Кузинаков.

Инаку новите директори со албанска етничка припадност се блиски до партијата ДУИ односно до скопското крило кое изминативе неколку дена јавно објави „партиска војна“ против Артан Груби и Али Ахмети додека директорот на Градски паркинг е генерален секретар на партијата ГРОМ.

За потсетување пак, претходно во јавноста, Арсовска истакна дека ќе бара квалитетни и непартиски кадри кои нема да бидат „под влијание“ на партиските лидери. Се чини, дека Арсовска тоа што го кажа со именувањето на овие директори истото не го испочитува.

Во ЈП Комунална Хигиена продолжуваат со раководство Косана Мазнева, ЈСП Александар Стојковски и ЈП Водовод Марјан Митевски.

Новите в.д директори ќе имаат обврска и одговорност во следните 6 месеци да ги спроведат неопходните реформи со цел консолидација на јавните претпријатија во периодот кој следи од аспект на справување со економската и енергетската криза. Обврските се во насока на оптимизација на средствата и процесите, намалување на трошоците и кратење на сите непродуктивни трошења, како и спроведување на реформата во сегментот на вработувања во претпријатијата со која нема да се дозволи лица кои не одат на работа или не ги извршуваат работните обврски да бидат платени од буџетските средства.