Имплементацијата на Интегрираниот информациски систем за управување со финансии (ИФМИС) во моментов е приоритетен проект на Министерството за финансии. ИФМИС ќе овозможи воспоставување повеќегодишната буџетска рамка, управување со јавните инвестиции, автоматизиран надзор над обврските, управување со основните средства и управување со долгот.
Ова беше посочено на средбата која министерот за финансии Фатмир Бесими ја оствари со извршниот директор на СБ, Кун Давидсе, потпретседателката Ана Бјерде, регионалната директорка за Западен Балкан, Ксијаокинг Ју и директорот на СБ за земјава Масимилијано Паолучи.
Тема на средбата беше воспоставувањето на Интегрираниот информациски систем за управување со финансии и приоритетите во новата четиригодишна рамка за соработка на земјава со Светска банка
ИФМИС е дел од реформите што ги спроведува Министерството за финансии, во управувањето со јавните финансии. Целта на овој систем е да ја подобри ефикасноста и транспарентноста во управувањето со јавните финансии, што ќе се постигне преку поврзување на постоечките фрагментирани и неповрзани системи, на една централизирана дигитална платформа.
-ИФМИС е и во насока на залагањата на Владата за GovTech, односно имплементирање на напредни технологии во работењето, истакна Бесими на средбите актуелизирајќи го прашањето на финансирањето на имплементацијата на ИФМИС, со цел што побрзо ефектуирање на Законот за буџети.
Воедно на средбата беше потврдена добрата реализација на проектите во рамки на четиригодишната рамка, особено во делот на енергетската ефикасност.
Како што соопштија од Министерството за финансии, проектот за енергетска ефикасност во вредност од 25 милиони евра се имплементира преку единицата на МФ за спроведување на проектот за подобрување на општинските услуги со поддршка на СБ. Во моментов е завршена постапката за 42 проекта на 12 општини коишто аплицирале и за кои се исполнети условите за сеизмичка стабилност, а е започната постапката за енергетска ефикасност на 16 здравствени објекти.
Министерот Бесими истакна дека со инвестициите предвидени со четиригодишната рамка за соработка се инвестира во подобрување на инфраструктурата, човечкиот капитал и управувањето со јавните финансии.
Од Министерството информираат дека вредноста на постоечката четиригодишната рамка за соработка изнесуваше 420 милиони долари, но поради ковид кризата беа одобрени 508 милиони долари. Притоа постоечката Стратегија истекува во јуни 2023, при што подготовките за новата, ќе започне на почетокот од наредната година, веднаш по завршувањето на извештајот за земјата.