Бектеши пред германска бизнис делегација ги презентираше можностите за инвестиции во обновливи извори на енергија

Министерот за економија Крешник Бектеши денеска ги презентираше можностите за инвестиции во енергетиката, пред се во обновливи извори на енергија кои произлегуваат од Законот за енергетика, како и Законот за стратешки инвестиции пред германска бизнис делегација која го придружува германскиот претседател Франк Валтер Штајнмајер кој е во официјална посета на земјава.

Како што информираат од Министерството за економија, Бектеши на средбата истакнал дека и покрај енергетската криза која што ја зафати не само земјава, туку и цела Европа, развојот и инвестициите во енергетскиот сектор е еден од главните приоритети на Владата со главна цел обезбедување одржливо снабдување со енергија како и придвижување кон зелена економија.

-Главните цели на енергетската политика на Македонија се привлекување инвестиции за изградба на енергетски капацитети и зголемување на искористеноста на обновливите извори на енергија, поточно инвестирање во зелена енергија што ќе придонесе за заштита на животната средина, животот и ублажување на климатските промени, кажа министерот Бектеши и додаде дека земјава веќе има усвоено Стратегијата за развој на енергетиката до 2040 година, како еден од најважните стратешки документи во областа на енергетиката и одржливиот развој.

Нагласи дека блиските релации со Сојузна Република Германија најдобро се гледаат преку билатералната соработка која што е во континуиран раст и додаде дека Германија е наш прв и најголем економски партнер каде се реализира речиси 45 отсто од нашиот вкупен извоз.

Во земјава има околу 200 германски компании меѓу кои и WPD која вложува околу 500 милиони евра во ветерна електро-централа во Куманово – Крива Паланка, и која претставува сериозен чекор во производството на електрична енергија од обновливи извори.

Стопанската делегација во чиј состав се претставници на повеќе германски компании, државни институции и банки е предводена од Штефан Венцел, парламентарен државен секретар од Сојузното министерство за економија и клима и Д-р Јоханес Шојбе, советник и раководител на сектор економија во кабинетот на германскиот претседател.