Градоначалникот Ѓорѓиевски на средба со унгарскиот амбасадор Андраш Клајн

Градоначалникот на Општина Кисела Вода, Орце Ѓорѓиевски денеска оствари средба со новиот унгарски амбасадор Андраш Клајн, на која му ја претставил личната карта на општината, како и приоритетните проекти предвидени во неговата програма.

На средбата, како што соопштија од Општината, се разговарало и за досегашната соработка со Унгарија преку нејзината Амбасада во земјава.

- Општина Кисела Вода секоја година е дел од чествувањето на Националниот ден на унгарскиот народ и го одбележува со пригодна свеченост пред спомен плочата на Шандор Петефи во населбата Драчево. Петефи е една од клучните фигури во Унгарската револуција од 1848 година и поставувањето на темелите за целосно осамостојување на унгарската држава. Ѓорѓиевски проговори со амбасадорот и за одличната соработка со Здружението на унгарците во Македонија, „Теледом", чиј претседател Јожеф Шутуш беше присутен на денешната средба, се наведува во соопштението.

Заеднички биле дефинирани повеќе области во кои е можно продлабочување на соработката и остварување на уште поблиски релации меѓу Општина Кисела Вода и Република Унгарија.