Општина Кисела Вода и „Меѓаши” со проект за унапредување на детските права
Градоначалникот на Општина Кисела Вода, Орце Ѓорѓиевски денеска беше дел од информативната сесија „Место за растење: Општини посветени на децата”, организирана од Првата детска амбасада во светот „Меѓаши” и Центарот за семејно и детско згрижување - КМОП Скопје.
Се работи за 30-месечен проект, финансиран од Делегацијата на ЕУ, чија цел е унапредување и заштита на правата на децата преку изготвување локален акциски план во општините низ Македонија. Проектот опфаќа пет општини, а Кисела Вода е единствената скопска општина каде веќе се спроведуваат активности во насока на зајакнување на капацитетите за унапредување на локалното стратешко планирање и воведување алатки за мониторирање на состојбата со детските права, како и за подигнување на свеста околу ова важно прашање.
На настанот на кој присуствуваа голем број лица од општинската администрација, советници, претставници од училиштата и градинките,градоначалникот Ѓорѓиевски ја истакнал улогата на локалната самоуправа во процесот на создавањето на заедница во која децата можат да растат и да се развиваат, во сигурно опкружување кое го стимулира нивниот интелектуален потенцијал. Тој, како што соопштија од Општина Кисела Вода, ги нагласил проектите кои општината досега ги има преземено и потенцирал дека за заштита на правата на децата е потребна заедничка и системска поддршка од сите институции, образовни установи, здруженија на граѓани, родители, бидејќи децата се најранливата и најважната категорија во нашето општество.
Во Општина Кисела Вода, овие заложби не се само декларативни за што говорат преземените чекори во насока на остварување на нивните права. За оваа година и половина откако го прездов управувањето со Кисела Вода, ставивме во функција две градинки, едната од нив е првата целосно инклузивна во Скопје, реконструиравме повеќе училишни објекти, од кои повторно ќе го издвојам училишниот објект на ООУ „Кузман Јосфовски Питу”, кој исто така е целосно инклузивен, бидејќи на овој начин ги унапредуваме условите за буквално сите дечиња, без разлика со какви предизвици се соочуваат. Тука се и реновирањето на неколку училишни сали, изградбата на сензорни соби, опремувањето со смарт табли на училиштата бидејќи пристапот до најновите технологии, им овозможува да стекнат знаења и вештини потребни за успешно справување со предизвиците на современиот свет. Во насока на обезбедување на повеќе простор за детска игра и активности, активно работиме на изградба на нови паркови како што е на пример паркот „Иднина” и паркот, односно веќе спортско-рекреативен центар кај местото викано „Оксиген”, реконструкцијата на постојните паркови и шеталишта, огромниот број на детски катчиња кои се нови или со обновени содржини и многуте манифестации каде задолжително организираме програма прилагодена за дечињата. За децата со церебрална парализа, отворивме бесплатен клуб за социјализација и развој, рекол Ѓорѓиевски.
Акцискиот план за правата на децата, чии темели ги поставуваме преку ваквите информативни сесии, истакнал, секако треба да содржи и чекори со кои ќе се се зголеми свеста за заштита на децата од насилство и злоставување.
Како што навел градоначалникот, во општина Кисела Вода веќе активно функционира локалниот совет за превенција преку кој, како новина во нашето општество, понудивме на локално ниво системско решение за справување со булингот.
- Имено, на жртвите од врсничко насилство или на нивните блиски им ставивме на располагање телефонска линија каде може да добијат поддршка од тим од психолози од невладиниот сектор, кои потоа, во координација со општинските служби ќе делуваат директно во училиштето за спречување на насилната појава. Секако, проблемот може да се пријави и во училиштето, а пријавата може да биде и анонимна бидејќи насекаде се поставени кутии за пријави за булинг. Знаејќи дека ваквите проблеми не се реткост, добра вест е дека жртвите се охрабриле и дека на овој телефон веќе пристигнале неколку пријави, истакнал градоначалникот Ѓорѓиевски, потенцирајќи ја вредноста на ваквот проект кој го спроведуваат првата детска амбасада Меѓаши и КМОП Скопје.
На настанот пред присутните говореле и основачите nа Првата детска амбасада во светот - Меѓаши, Драги Змијанац и Гордана Пирковска Змијанац, проектот бил детално претставен, по што се дебатирало за реализацијата и динамиката на проектот.
