Играта „Чичко Мрчатор“ преведена на македонски јазикv

Институтот за комуникациски студии (ИКС) информира дека преку играта „Чичко Мрчатор“ (Cranky Uncle) корисниците можат да научат да се борат против дезинформациите со критичко размислување.

Оваа игра е развиена од научникот Џон Кук од Универзитетот во Мелбурн и креативната агенција „Goodbeast“. Сега е преведена и на македонски јазик од Институтот за комуникациски студии и е бесплатно достапна за iPhone и Android.

- Играта „Чичко Мрчатор“ користи цртани филмови, хумор и критичко размислување за да ги открие погрешните техники на негирање на науката и да изгради отпорност на јавноста против дезинформациите. За да објасни зошто и како некои луѓе ги отфрлаат научните докази, авторот го создаде ликот Чичко Мрчатор, членот на семејството што сите го имаме по дома и кој мисли дека знае подобро и од светските научници, се наведува во соопштението од ИКС.

Играта е преведена во рамки на проектот „Користи факти: употреба на новинарството засновано врз факти за подигнување на свеста и за спротивставување на дезинформациите во медиумскиот простор во Северна Македонија“, финансиран од Британската амбасада во Скопје.