Амбасадорот на САД во ОН најави дека санкциите против Додик ќе продолжат

Амбасадорот на САД во Обединетите нации (ОН) Роберт Вуд најави дека ќе продолжат санкциите против претседателот на Република Српска, Милорад Додик и оние кои, како што рече, му ги овозможиле неговите „антидејтонски и коруптивни акции“.

„Неговите опасни дејствија и сецесионистичка реторика ги загрозуваат мирот и стабилноста во регионот. Санкциите против Додик и оние кои ги овозможија неговите антидејтонски и коруптивни акции ќе продолжат и во иднина“, рече Вуд на седницата на Советот за безбедност на ОН посветена на ситуацијата во Босна и Херцеговина.

Тој оцени дека политичарите кои инсистираат на поделби ги штитат нивните интереси, додавајќи дека РС и Додик се пример за тоа, бидејќи тие ги забрзуваат чекорите кон поткопување на институциите и повикуваат на распаѓање на државата.

„На денешниот состанок ја истакнуваме опасноста од етнонационализам што произлегува од една насока. Русија го злоупотребува Советот за безбедност за свои цели. САД ги повикуваат сите влади да соработуваат и да ги искористат одлуките на ЕУ за да започнат преговорите со Босна и Херцеговина. Сите лидери треба тежнеат кон евроатлантска интеграција“, оцени американскиот амбасадор во ОН.

Тој додаде дека САД се залагаат за избегнување на етнонационални агенди и промовирање на транспарентно владеење.