Третата влада на Пленковиќ можно е да биде избрана веќе в петок, ден по конститутивната седница на новиот хрватски Сабор

Третиот владин кабинет на премиерот и лидер на ХДЗ, Андреј Пленковиќ, би можел да биде избран веќе на собраниската седница в петок, ден по конститутивната седница, која претседателот на Републиката Зоран Милановиќ ја свика за в четврток, на 16 мај.

Премиерот Пленковиќ вчера на членовите на партиското претседателство им откри дека Жељко Рајнер ќе остане потпретседател на Саборот од редовите на ХДЗ, Татковинското движење на оваа функција ќе го предложи претседателот на партијата и градоначалник на Вуковар, Иван Пенава, а трет потпретседател ќе биде од редовите на малцинските партии, па тоа ќе биде Фурио Радин.

Како што пренесуваат хрватските медиуми, веќе се познати имињата на претседателите на собраниските комисии, а на првата седница партиите ќе треба да именуваат замени за пратениците кои поднесоа оставки или се на некомпатибилни функции.

Хрватскиот портал Нет од претседателот на Мандатно-имунитетната комисија Роберт Јанковиќ дознава дека според досегашните податоци ќе бидат сменети 35 пратеници, но таа бројка може да биде различна до утре до 11 часот, кога истекува рокот за поднесување барање за замена.

Тројца пратеници поднесоа оставки затоа што повеќе сакаат да бидат дел од Европскиот парламент и тоа: Мислав Колакушиќ, Билјана Борзан и Предраг (Фред) Матиќ.

До крајот на неделата, наведуваат од комисијата, може да се затвори разговорот за новата Влада.

Од Кабинетот на претседателот одговорија за порталот Нет дека претседателот Милановиќ ќе го потпише Законот за организација на Владата веднаш штом го добие, како што направи минатиот пат (2020 година) кога беше изгласана Владата, само еден ден по конституирањето на Собранието.

Со него ќе бидат дефинирани и две нови министерства, а тоа е услов веќе в петок, ден по конституирањето на Собранието, да се гласа за владата, односно третиот кабинет на Андреј Пленковиќ.