Камерниот оркестар од Битола дел од чествувањето на „Денот на светите Кирил и Методиј“ во Рим

Во организација на Министерството за култура, а во рамки на културната програма за одбележување на традиционалната манифестација „Ден на светите Кирил и Методиј“ во Ватикан, попладнево во салата „Балдини“ во Рим, концерт ќе одржи Камерниот оркестар на Битола, кој како секстет ќе настапи со солистката Нада Талевска-Спасовска.

Како што информираат од Министерството за култура, на концертот во чест на сесловенските просветители ќе бидат изведени македонски изворни песни, меѓу кои и „Бор садила мома Евгенија“, „Елено ќерко“, „Јовано Јованке“, „Налеј, налеј“, сплет од староградски песни за Битола, византиски песни и други дела од богатата македонска изворна музичка ризница.

Државно-црковната делегација од Република Северна Македонија од денеска престојува во Рим и во Ватикан каде што ќе се поклони на гробот на Свети Кирил, во рамки на манифестацијата „Ден на светите Кирил и Методиј“. Во државно-црковната делегација што ја предводи претседателката на државата Гордана Сиљановска-Давкова, се и заменик-министерот за култура Онур Али и претставници од Министерството за култура.

Според агендата, државно-црковната делегација попладнево ќе присуствува на концертот на македонските уметници.

Традиционално, на програмата на тридневната манифестација „Ден на светите Кирил и Методиј“ е и аудиенцијата кај папата Франциск во Ватикан, средба со државниот секретар на Светиот Престол, монсињор Пјетро Паролин, молебен во базиликата „Сан Клементе“ во Рим и положување венец на спомен-плочата на македонски јазик во базиликата „Санта Марија Маџоре“.

- Манифестацијата „Ден на светите Кирил и Методиј“ во Рим во изминатите години прерасна во празник со кој се слави мисијата на светите браќа, чија хумана активност остави траен белег во историјата на Европа. Оваа манифестација е силна врска во унапредувањето на односите меѓу Северна Македонија, Република Италија и Светиот Престол, се навдува во соопштението од Министерството за култура.

Поклонението на гробот на Свети Кирил во базиликата „Сан Клементе“ во Рим првпат е организирано во 1969 година за 1100 години од смртта на Свети Кирил, и оттогаш секоја година на 24 мај се одбележува со највисоки почести од црковно-државна делегација.