Операта „Рита“ во Центарот за култура во Куманово

Кумановци вечерва ќе имаат можност да ја проследат операта „Рита“, со почеток од 20 часот, соопштија денеска од НУЦК „Трајко Прокопиев“. Македонската опера и балет гостува со операта од италијанскиот оперски композитор Гаетано Доницети, диригент е Андреј Наунов, режија на Трајко Јордановски.

- На изненадување на кумановци и на огромно наше задоволство по седум години ни гостува македонска опера и балет со опера. Влезот е симболичен, цената се должи поддршката од министерството за култура. Станува збор за убав настан кој му недостигаше на Куманово. Ги поканувам сите да ја проследат и да уживаат, изјави Александар Митрички од НУЦК „Трајко Прокопиев“.

Во претставата играат Ана Ројдева, Јане Дунимаглоски, Васко Здравков, Шинаси Рамадан, Никола Чедомировски. Од НУЦК велат дека и годинава ќе реализираат настани на отворено.

- Како и секое лето и ова ќе биде плодно. Сега поради реконструкцијата на малиот плоштад ќе видиме кои настани ќе бидат пред платото, а кои во фоајето. Нека нè следат кумановци, навремено ќе бидат известени за точни датуми и време, кажа Митрички.