Николоски на средба со новиот директор на БЈБ, Јанев: Постојат индиции за направен криминал во Железници и ЈП Државни патишта

Министерот за транспорт и вицепремиер, Александар Николоски, денеска оствари средба со новиот директор на Бирото за јавна безбедност Александар Јанев.

Николоски информираше дека на средбата станало збор за криминалот на функционерите во владата на СДСМ и ДУИ.

- Денес во Министерството за транспорт се сретнав со Александар Јанев директор на Бирото за јавна безбедност во МВР и дел од неговиот тим кои работат предмети од областа на организираниот криминал и корупција.

На денешната средба разговаравме за индиции за сторен криминал и неодговорното трошење пари во рамки на ЈП Железници Инфраструктура и Јавно претпријатие за државни патишта. Овие индиции произлегоа од извештајот за капитални инвестиции на државниот завод за ревизија, а во следниот период ќе се разгледуваат и други предмети и активности во рамки на министерството за транспорт и институциите кои се под негова надлежност.

Борбата со корупцијата и криминалот е главен приоритет на оваа Влада. Ќе се истражи целата работа и сиот можен криминал. Нема да дозволиме никој да ги краде народните пари и никој не смее да биде над законите!, вели Николоски.